Loading...
|
Il Club da skis Vuorz ei vegnius fundaus igl onn 1936 per promover il sport da neiv en vischnaunca da Vuorz ed en vischinonza. Il club emprova da contonscher siu intent cun organisar eveniments e cun porscher instrucziun da sport da neiv alla giuventetgna. Il club ei commember da Swiss-ski (Uniun da skis svizra) e dil BSV (Uniun da skis grischuna) e ha oz 107 commembras e commembers. Las instrucziun da sport da neiv alla giuventetgna vegn dapi igl onn 2007 menada atras ensemen cul Club da skis Breil/Brigels. La JO Breil/Vuorz sa aschia porscher bunas cundiziuns da trenament per in e scadin. Per las commembras ed ils commembers organisescha il club mintga dus onns in viadi. Ils davos viadis ein stai: Zermatt 2011 (ir cun skis), Adelboden 2009 (slalom gigant e slalom special mundial dils umens), Pitztal 2007 (ir cun skis), Sölden 2005 (ir cun skis), St. Murezi 2003 (campiunadis mundials da skis), Kitzbühl 2001 e 1999 (cuorsa rapida mundiala). Il club ha ina liunga tradiziun en organisar cuorsas da skis, seigi quei localas, regiunalas, naziunalas ni internaziunalas. Naven dalla fundaziun entochen sil gi dad oz vegn mintg‘onn arranschau la cuorsa dil club e da scola. Els emprems onns ha il club organisau stafettas da cuorsa liunga e dapi 1937 tochen 1966 ina cuorsa rapida. In slalom special ei vegnius organisaus da 1941 tochen 1974. En memoria ei era la legendara cuorsa rapida populara cun biars participonts ch‘il club ha menau atras da 1983 tochen 1992. Dapi igl onn 1989 tochen sil gi dad oz vegn igl SST Mini Cup organisaus. Igl onn 2001 han ils clubs da Breil, Vuorz ed Andiast arranschau il campiunadi svizer dallas junioras e dils juniors el super-G e cuorsa rapida. Las medemas uniuns han organisau igl onn 2005 ensemen il campinadi svizer dad JO. Entras il club han era adina puspei cuorsas internaziunalas da FIS giu liug en nies territori. Vinavon porscha il club dapi igl onn 1980 duront igl unviern mintgamain ina gada per jamna la sera in trenament da gimnastica en halla per in e scadin. Ultra da quels eveniments surpren il club adina puspei l‘organisaziun dalla sera da famiglia ni dalla fiasta d‘emprem d‘uost a Vuorz. Commembers Dils 107 commembers ein 48 commembers activs, 25 commembers passivs e 34 commembers d‘honur. Sche era Ti has interess da daventar commember activ (taxa annuala CHF 15.-) ni passiv (taxa annuala CHF 40.-), stoss mo scriver in E-Mail cun num, prenum, adressa, liug, natel, e-mail, gi da naschientscha e passiv ni activ alla suandonta adressa csv@ski-breil-vuorz.ch ni contactar il president. Gilets Commembras e commembers dil club san empustar il suandont gilet dil Club da skis Vuorz per CHF 40.- tier il cau da material. |
|